Павлодар қаласында «Өнеркәсіпті дамыту қоры» АҚ және «Жасыл даму» АҚ қаржылық қолдауымен жаңа, заманауи қоқыс өңдеу зауытының құрылысы басталды. Осы экологиялық жобаны іске асыру барысында өндірістік ғимаратты салу және осы саладағы халықаралық стандарттарға сәйкес келетін жоғары технологиялық жабдықтарды сатып алу 12 жыл мерзімге жылдық 3% жеңілдікті мөлшерлеме бойынша қолдауға алынды.
«Сұрыптау орталығы» ЖШС қоқыс өңдеу кешенінің қызметі ҚТҚ-ны өңдеуге бағытталады, бұл ретте қағаз, пластик, шыны және металдар сияқты құнды қайталама ресурстарды алу түсетін қалдықтардың жалпы көлемінің 30%-ына дейін құрайды. Осылайша, бастапқыда кәдеге жаратылған материалдардың үштен бірі өнеркәсіптік мақсаттарда одан әрі пайдалануға жарамды болады.
Биыл пайдалануға беру жоспарланып отырған кәсіпорынның қуаты жыл сайын 150 000 тонна ҚТҚ өңдеуге мүмкіндік береді. Соның нәтижесінде жаңа қоқыс өңдеу зауыты Павлодар өңірінің экологиялық инфрақұрылымының маңызды элементіне айналады.
Жаңадан салынып жатқан кешен макулатура, картон, пластик және полимерлік бұйымдар, шыны сынықтары, металл сынықтары, кондициясыз құрылыс материалдары, өзге де пайдаланылған заттар сияқты қалдықтарды өңдейді.
Қоқыс өңдеу кәсіпорнын іске қосу сұрыптау, қайта өңдеу, сақтау және өндірісте қайта пайдалану үшін екінші реттік пайдалы материалдарды өткізу бойынша ұйымдастырылған технологиялық тізбек арқылы қоршаған ортаға түсетін экологиялық жүктемені және шығарындыларды айтарлықтай азайтуға ықпал етеді.
Осы кешенді пайдалану кезіндегі экологиялық әсер жерленетін қалдықтардың айтарлықтай қысқаруынан көрінеді, бұл бар қоқыс полигондарына жүктемені едәуір азайтады, қоқыс орналастыруға жаңа жер учаскелерін бөлу қажеттілігін төмендетеді, сондай-ақ парниктік газдардың (CO₂) шығарындыларының азаюына әкеледі.
«Өнеркәсіпті дамыту қоры» АҚ қаржылық қолдауымен ҚТҚ-ны өңдеу кәсіпорнын ашу арқасында 100-ден астам жаңа жұмыс орны ашылады және өңірдің экологиялық қауіпсіздігі арттырылады.
Еске сала кетейік, 2024 жылдан бастап Қазақстан Республикасының «жасыл экономикаға» көшу тұжырымдамасы шеңберінде «Өнеркәсіпті дамыту қоры» АҚ ҚР Экология және табиғи ресурстар министрлігімен және «Жасыл даму» АҚ-мен бірлесіп экологиялық теңгерімді нығайтуға бағытталған қатты тұрмыстық қалдықтарды сұрыптауды, өңдеуді және кәдеге жаратуды жүзеге асыратын кәсіпорындарды қолдау бағдарламасы іске асырылуда.
Осы бағдарлама қолданылып жүрген кезеңде Қор бүкіл ел бойынша экологиялық теңгерімді сақтауға бағытталған қызметі бар 25 қоқыс өңдеу кәсіпорнын құруды және кешенді жаңғыртуды қолдады.
Атап өтейік, экологиялық ESG-күн тәртібі «жасыл» инвестициялық жобаларды қолдауға ерекше назар аударатын «Өнеркәсіпті дамыту қоры» АҚ-ның іргелі басымдықтарының бірі болып табылады.
Еске сала кетейік, 2025 жылы Sustainable Fitch халықаралық рейтингтік агенттігі Өнеркәсіпті дамыту қорының жиынтық балын 63-тен 66 тармаққа дейін көтерді және ESG рейтингін «2» деңгейінде растады. Бұл ел қаржы секторы құрылымдарына берілген ең жоғары бағалардың бірі. Белгілі болғандай, ESG-күн тәртібі, ең алдымен, экологиялық және әлеуметтік факторларды қамтиды.
