2025 жылғы 13 тамызда Өскемен қаласында «Өнеркәсіпті дамыту қоры» АҚ-ның қаржылай қолдауымен Шығыс Қазақстан облысының Ветеринария басқармасына 113 қызметтік автокөлікті салтанатты түрде табыстау рәсімі өтті.
Іс-шараға Шығыс Қазақстан облысының әкімі Нұрымбет Сақтағанов, облыстық Ветеринария басқармасының, салалық мемлекеттік органдардың басшылығы қатысты.
Ведомствоның автопаркі отандық өндірістегі JAC, Chevrolet Cobalt, ГАЗ маркалы автокөліктермен толықты. Ағымдағы жылдың қазан айына дейін Өнеркәсіпті дамыту қорының қаржылай қолдауымен аталған мекемеге тағы 19 осындай автокөлік жеткізіледі.
Жоғары өтімділігімен ерекшеленетін JAC T6 пикаптары мамандарға Шығыс Қазақстан облысына тән таулы аймақтардағы елді мекендерге кедергісіз жетуге мүмкіндік береді. JAC N56 фургондары мен ГАЗ маркалы тоңазытқыш-фургондары жануарларға арналған жабдықтар мен препараттарды тасымалдауға арналған, ал Chevrolet Cobalt жеңіл автокөліктері ветеринар мамандардың аудан және ауылдық округтер аумағында нормативтік шараларды орындау және үй жануарларын вакциналау мақсатында жедел жүріп-тұруына қажет.
Айта кету керек, ветеринар мамандарға арналған қызметтік автокөліктердің едәуір артуы өңірдің азық-түлік қауіпсіздігін нығайтуға, халықты сапалы сүт және ет өнімдерімен тұрақты қамтамасыз етуге ұзақ мерзімді оң әсерін тигізеді.
Белгілі болғандай, ветеринариялық қызмет ауыл шаруашылығы жануарлары арасында әртүрлі аурулардың алдын алу және оларды болдырмау жөніндегі аса маңызды функцияны орындайды, ал тиімді жұмыс істеу үшін мамандарға өңірдің түкпір-түкпіріндегі алыс елді мекендерге дейінгі көп шақырымдық қашықтықтарды еңсеруге мүмкіндік беретін тиісті көлік қажет.
Ветеринариялық қызметтің автопаркін осындай көлемде толықтыру және жаңарту көрсетілетін қызметтердің сапасын және мамандардың мобильдігін арттырудың маңызды факторы болмақ. Бұл, әсіресе, аумағы 97 мың шаршы километрден асатын, Қазақстандағы көлемі бойынша төртінші өңір саналатын Шығыс Қазақстан облысы үшін өзекті.
